Солонго билээ би

Ижийгээс минь асгарсан улаан бороо
Эцгийн минь зүрхийг норгож арилсны дараа
Голоон эгштэл хүлээсэн
Говь дээгүүр татсан
Нарыг зургаа хэрчсэн тоонотой гэр дээгүүр татсан
Намайг тэврэх гэж яарсан бүхний өвөр дээгүүр татсан
Солонго билээ би Эрхий ороох сур шиг хүний богинохон заяанд
Элбэг дутуу нь ялгаагүй амьдын эрээн зүүдэнд
Нэгэн үзүүр нь тэнгэрээс хөллөж
Нөгөө үзүүр нь газарт уллах
Зуурхан төдий татаад арилах
Зургийн алаг солонго билээ би

Хүн дээгүүр гишгэлсэн он жилүүдийн
Зуурын төдий босоо үзэгдэл
Хувилгаан бор газар хөх тэнгэрийн
Зугаа төдий хоосон чанар
Нумын бөгтрөг шиг болж ирээд чулуу жийж татсан
Нарны тал шиг болж ирээд цэцэг илж татсан
Оногдсон заяаныхаа ааг омог дээгүүр олойртож татсан
Олдохгүй хоёр буурлынхаа булшин дээгүүр бөхийж татсан
Эхлэх үзүүр нь сүүнд дүрээстэй
Эцэслэх үзүүрт нь нулимсанд дүрээстэй
Солонго билээ би 

Б.Лхагвасүрэн

Нэгэн амралтын өдөр

За амралтын өдрийн мэнд

Энэ долоо хоног сонин өнгөрлөө :).
Нэг дэхээс эхлээд магистрын диплом авах ёслол, бүжгийн хичээл,  үдэшлэг, шинэ ном (Ногоон нүдэн лам, гайхалтай ном),  зааланд тоглох, дэлгүүр хэсэх гээд сэтгэл хөдөлгөсөн олон үйл  явдал болж өнгөрлөө.

Яагаад ч юм хэтэрхий хөнгөн амьдраад байгаа юм шиг, ямар нэг юм орхигдулаад байгаа юм шиг сонин мэдрэмж төрөөд байх юмаа. Магадгүй байнга ачаалалтай ажиллаж, хичээллэсээр байгаад дасчихсан юм болов уу.  Хүн гэдэг шуналтай амьтан юмаа хэхэ. Дөнгөж саяхан магистраа төгсчихвөл жаргалтай байх юм шиг санагдаж  байсансан.  Шинэ зорилготой болох цаг болсон юм шиг байна.

 Шинэ зорилго....

ХАВРЫН НОГОО

Цоодолын Хулан

Идэрхэн танхил нас минь дахин ирэхгүй

Ийм л хаврын ногоо хөлийн дор ургахгүй

Инээд алдан өөдөөс чинь гэнэт харах минь давтагдахгүй

Илбийн юм шиг зөөлөн салхи өнөөдрийнх шиг үлээхгүй

Би яг л энэ хаврын ногоо шиг

Билгийн цэнхэр тэнгэртээ ирж яваа шувуу шиг

Би бийр нь үгүй зурагдсан сонгодог нэгэн бүтээл ээ

Р.Эмүжин

Хаврын хаварт л би 
Дурлачихсан явдаг 
Хар л нүдтэй тэр залууг 
Саначихсан байдаг 
Хамгийн гэгэлгэн үедээ 
Түүнд зориулж шүлэг бичдэг 

Хайлаас, одод, үнсэлтийн тухай 
Саяхны юм шиг дурсдаг 
Бодлогогүй хэлсэн үг бүхэн нь 
Урвах хүслийг төрүүлдэг 
Бороотой үдшээр түүнийг санахдаа 
Уйлахгүй байхыг хичээдэг 
Өнгөрсөн он жилүүдэд 
Өөрийгөө олоогүйдээ харамсдаг 
Өнгө мөнгө, шунал хүслээс 
Өр зүрх минь түүнийг харамладаг 
Хаврын хаварт л би 
Дурлачихсан явдаг аа